WANANCHI wa Kata ya Majengo, katika Manispaa ya Sumbawanga mkoani Rukwa, wanatarajia kupata nafuu ya upatikanaji wa maji kufuatia kukamilika kwa ujenzi wa Bwawa la Mwambazi lililogharimu Sh bilioni 2.1.
Mradi huo unalenga kuongeza upatikanaji wa maji na kupunguza changamoto ya mgao wa maji ambayo imekuwa ikiwaathiri wakazi wa eneo hilo katika shughuli zao za kila siku na kujipatia kipato.
Baadhi ya wananchi wa Kata ya Majengo wamesema kukamilika kwa bwawa hilo kumewapa matumaini ya kupata huduma ya maji kwa urahisi zaidi na kupunguza changamoto ambazo wamekuwa wakikabiliana nazo kutokana na mgao wa maji.
Akizungumzia mradi huo, Msimamizi wa Bodi ya Maji Bonde la Ziwa Rukwa, Mhandisi Emanuel Nduiya, amesema ujenzi wa bwawa hilo umekamilika na lina ujazo wa lita milioni 741.
Amesema bwawa hilo linatarajiwa kusambaza maji katika zaidi ya kata saba za Manispaa ya Sumbawanga, hatua itakayosaidia kupanua wigo wa upatikanaji wa huduma hiyo kwa wananchi.
Kwa upande wake, Mbunge wa Sumbawanga Mjini, Aeshi Hilaly, amesema kukamilika kwa mradi huo ni hatua muhimu katika kukabiliana na changamoto ya kukatika kwa maji mara kwa mara katika maeneo husika.
Hilaly ameyasema hayo wakati wa ziara ya kukagua miradi ya maendeleo inayotekelezwa katika jimbo hilo, ambapo amesisitiza umuhimu wa wananchi kushiriki katika kulinda miundombinu ya maji.
Amewataka wananchi kutunza miundombinu hiyo ili iweze kuendelea kutoa huduma kwa ufanisi na kuhakikisha uwekezaji huo unanufaisha kizazi cha sasa na kijacho.






