Chama cha Walimu Tanzania (CWT) Mkoa wa Pwani kimeiomba Serikali ya Mkoa huo kuwakumbusha waajiri kutekeleza wajibu wao wa kuitisha vikao vya mabaraza ya wafanyakazi kwa kuzingatia taratibu na matakwa ya kisheria.
Ombi hilo limetolewa Oktoba 10, 2026, na Katibu wa CWT Mkoa wa Pwani, Susan Shesha, wakati wa mkutano wa uchaguzi wa mwakilishi wa mkoa huo katika Kamati ya Utekelezaji ya Taifa (KUT) ya chama hicho.
Shesha amesema idadi ya vikao vya mabaraza ya wafanyakazi vilivyokuwa vimefanyika hadi wakati huo ilikuwa ndogo, huku kikao kimoja pekee kikiwa kimefanyika. Kutokana na hali hiyo, ameiomba Serikali ya Mkoa kuwahimiza waajiri kuhakikisha vikao vinavyotakiwa vinafanyika kwa mujibu wa taratibu zilizowekwa.
Katika hatua nyingine, amemshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kuwekeza katika miradi mbalimbali ya sekta ya elimu na kutoa maelekezo kuhusu ulipaji wa stahiki za walimu.
Kwa upande wake, Katibu Tawala wa Mkoa wa Pwani, Richard Kayombo, ameahidi kuyafanyia kazi maombi yaliyowasilishwa na walimu, yakiwemo yale yanayohitaji ufumbuzi katika ngazi ya mkoa.
Kayombo pia amewataka walimu kujiandaa ipasavyo katika maeneo yao ya kazi ili kukabiliana na athari zinazoweza kusababishwa na mvua za El Niño na kuhakikisha zinaathiri kwa kiwango kidogo iwezekanavyo ratiba za masomo pamoja na shughuli za ufundishaji na ujifunzaji.
Aidha, amewahimiza walimu kuzingatia Dira ya Taifa ya Maendeleo ya mwaka 2050 katika utekelezaji wa majukumu yao, akibainisha kuwa sekta ya elimu ina jukumu muhimu katika kufanikisha malengo ya maendeleo ya taifa kwa kushirikiana na sekta nyingine.
Naye Mwita Magige, aliyechaguliwa kuwa Mjumbe wa Kamati ya Utekelezaji ya CWT Taifa, ameahidi kutetea haki na maslahi ya walimu pamoja na kuwasilisha changamoto zao katika mamlaka husika ili zipatiwe ufumbuzi.
Magige amesema ataitumia nafasi hiyo kuhakikisha kuwa hoja na mahitaji ya walimu yanapata uwakilishi unaostahili na kufikishwa katika ngazi zinazohusika kwa ajili ya kushughulikiwa.






