Shirika la Umoja wa Mataifa la Chakula na Kilimo (FAO) nchini Tanzania limewataka walimu na wazazi kushirikiana katika kutambua na kukuza vipaji vya wanafunzi ili kuwawezesha kutumia uwezo wao kuchangia maendeleo ya taifa.
Wito huo umetolewa Oktoba 14, 2026, na Mwakilishi Msaidizi wa FAO nchini Tanzania, Charles Tulahi, wakati wa mashindano ya uchoraji yaliyoandaliwa na shirika hilo katika Viwanja vya Shule ya Sekondari Usagara, jijini Tanga, ikiwa ni sehemu ya maonesho ya Siku ya Chakula Duniani.
Tulahi amesema mashindano hayo yanatoa nafasi kwa wanafunzi kuonesha ubunifu wao na kujifunza namna wanavyoweza kutumia vipaji vyao kuhamasisha jamii kuhusu masuala ya chakula na lishe.
Amewahimiza wanafunzi kuendeleza uwezo wao hata baada ya mashindano, ili waweze kuwa mabalozi wa ubunifu na kuifikishia jamii ujumbe kuhusu umuhimu wa upatikanaji wa chakula bora na lishe.
Ameongeza kuwa ubunifu wa wanafunzi una nafasi muhimu katika kuchangia upatikanaji wa chakula na kufanikisha malengo ya Dira ya Maendeleo ya Taifa ya mwaka 2050, hivyo ni muhimu vipaji vyao kuendelezwa na kupewa nafasi ya kukua.
Kwa upande wake, Mkuu wa Wilaya ya Muheza, Ayubu Sebabile, ambaye alikuwa mgeni rasmi katika mashindano hayo, amewataka wanafunzi kutumia vipaji vyao kubuni mawazo yatakayosaidia kuongeza uzalishaji wa chakula nchini.
Sebabile amesema ubunifu wa vijana unaweza kuchangia azma ya Tanzania kuwa miongoni mwa nchi zinazoongoza kwa uzalishaji wa chakula barani Afrika na duniani.
Aidha, ameeleza matarajio yake ya kuona wanafunzi wakiwasilisha michoro yenye ujumbe unaoendana na malengo ya mashindano hayo, huku akibainisha kuwa washiriki wameandaliwa zawadi za kutambua juhudi na ubunifu wao.
Alisema washindi watano watakabidhiwa zawadi maalumu Oktoba 16, 2026, wakati wa kilele cha maadhimisho ya Siku ya Chakula Duniani yatakayofanyika jijini Tanga.
Naye msimamizi wa mashindano hayo kutoka FAO amesema lengo ni kuwajengea wanafunzi uelewa kuhusu kaulimbiu ya mwaka huu na kuwahamasisha kuitumia kama msingi wa michoro yao.
Amefafanua kuwa michoro hiyo inalenga kuonesha uhusiano kati ya ubunifu, chakula na lishe, pamoja na mchango wa masuala hayo katika kufanikisha malengo ya Dira ya Maendeleo ya Taifa ya mwaka 2050.
Ameongeza kuwa kazi zote za washiriki zitapitiwa na wataalamu, kabla ya washindi watano kukabidhiwa zawadi katika kilele cha maadhimisho hayo Oktoba 16, 2026, jijini Tanga.






