Watu wenye ulemavu na mahitaji maalum mkoani Lindi wamesisitizwa kujitokeza kwa wingi kuchangamkia fursa za kiuchumi zinazotokana na miradi ya kimkakati mkoani humo, hususan katika sekta ya gesi asilia na mafuta.
Wito huo ulitolewa na Alusaria Mushi, Kaimu Mkuu wa Idara ya Maendeleo ya Jamii Manispaa ya Lindi, alipomwakilisha Mkuu wa Mkoa, Adam Malima, wakati akifungua kongamano la siku moja la wazawa jumuishi. Mkutano huo uliandaliwa kwa ushirikiano kati ya Chama cha Viziwi Tanzania (CHAVITA) Mkoa wa Lindi na Sauti ya Wanawake Wenye Ulemavu Tanzania (SWAUTA).
Mushi aliwataka wananchi wa makundi hayo kutojitenga au kujiona wanyonge, bali wajione ni sehemu ya maendeleo ya Kanda ya Kusini na watumie miradi mikubwa inayotekelezwa kujiletea tija. Aliongeza kuwa, tofauti na hapo awali ambapo serikali ilikuwa ikibuni mahitaji pekee, sasa wananchi wanahimizwa kuibua mahitaji yao ili serikali iweze kutoa huduma jumuishi zinazowagusa wote kwa usawa.
Naye Charles Nyangi, Mkuu wa Kitengo cha Ushirikishwaji wa Wazawa na Uhusishwaji wa Wadau kutoka Mamlaka ya Udhibiti Mkondo wa Juu wa Petroli (PURA), alieleza kuwa mamlaka hiyo inaendesha elimu kwa makundi maalumu—ikiwemo wanawake, vijana, wazee, na watu wenye ulemavu—kuhakikisha wananufaika na miradi ya mafuta na gesi.
“Kila mwananchi ana nafasi ya kushiriki na kufaidika na miradi hii. Licha ya uwepo wa wawekezaji wa kimataifa, bado wapo nafasi za wazi kwa wazawa kushiriki katika shughuli mbalimbali za kiuchumi,” alifafanua Nyangi.
Pia, aliwakumbusha umuhimu wa kuwa na biashara zilizosajiliwa rasmi ili kurahisisha upatikanaji wa zabuni na fursa mbalimbali zitakazotangazwa kwenye maeneo ya miradi.
Kongamano hilo lilihusisha pia maandalizi ya kuelekea Siku ya Kimataifa ya Viziwi, ambayo kitaifa inafanyika mkoani Kilimanjaro. Ili kuunga mkono juhudi hizo, PURA ilifadhili ushiriki wa wanachama watano wa CHAVITA kutoka Wilaya ya Kibiti na kutoa vifaa maalumu vya kusaidia usikivu.






