Mkazi wa Bunju A, Dar es Salaam, Laurence Kweka (48), amefikishwa katika Mahakama ya Wilaya ya Kinondoni akikabiliwa na shtaka la kumuua mkewe, Jane Urassa.
Kweka amesomewa shtaka hilo leo, Oktoba 15, 2026, na Wakili wa Serikali, Harrison Lukos, mbele ya Hakimu Mkazi Mwandamizi, Kemilembe Josiah.
Kwa mujibu wa maelezo ya shtaka, mshtakiwa anadaiwa kumuua mkewe Oktoba Mosi mwaka huu, katika eneo la Bunju A, Wilaya ya Kinondoni, jijini Dar es Salaam.
Kabla ya kusomewa shtaka hilo, mshtakiwa alielezwa kuwa hatakiwi kujibu chochote mahakamani kwa kuwa shauri hilo bado halijafikia hatua ya kusikilizwa kwa ushahidi.
Hakimu Josiah alimweleza Kweka kuwa kosa la mauaji analotuhumiwa nalo halina dhamana kwa mujibu wa sheria.
Aidha, mahakama ilibainisha kuwa haina mamlaka ya kusikiliza shauri hilo la mauaji, hivyo mshtakiwa ataendelea kusalia mahabusu wakati uchunguzi ukiendelea, kabla ya shauri hilo kupelekwa Mahakama Kuu kwa hatua zinazofuata.
Mahakama pia ilieleza kuwa shauri hilo litaendeshwa kwa njia ya mtandao huku mshtakiwa akiwa mahabusu.
Kesi hiyo imeahirishwa hadi Oktoba 29, 2026, kwa ajili ya kutajwa tena.






