Ofisi ya Uhamiaji Mkoa wa Mara imeendelea kutekeleza kampeni ya “Mjue Jirani Yako” kwa kutoa elimu kuhusu masuala ya uhamiaji kwa wanafunzi wa Shule ya Msingi John Bosco, iliyopo Kata ya Mukendo, Musoma Mjini.
Zoezi hilo lililofanyika leo, Oktoba 2, 2026, lililenga kuwajengea wanafunzi uelewa kuhusu masuala ya uhamiaji, huduma zinazotolewa na Idara ya Uhamiaji pamoja na umuhimu wa kuwa na uelewa kuhusu watu wanaoishi katika maeneo yao.
Elimu hiyo ilitolewa na maafisa wa Uhamiaji wakiongozwa na Mkaguzi Msaidizi wa Uhamiaji, Habiba Ally, akishirikiana na Konstebo Nassor Mohammed Khamis na Konstebo Sophia Ramadhan.
Akizungumza na wanafunzi hao, Habiba Ally alitoa elimu kuhusu uraia wa Tanzania na aina za uraia, huku akiwataka wanafunzi kufahamu wajibu wao kama raia.
Kwa upande wake, Konstebo Nassor Mohammed Khamis alieleza majukumu ya Idara ya Uhamiaji pamoja na masuala yanayohusu uhamiaji usiofuata taratibu za kisheria, ikiwemo sababu zinazoweza kuchangia uwepo wa wahamiaji wasio na hadhi halali nchini na madhara yake.
Naye Konstebo Sophia Ramadhan alitoa elimu kuhusu huduma mbalimbali zinazotolewa na Idara ya Uhamiaji pamoja na taratibu zinazohusika katika kupata huduma hizo.
Mwalimu Mkuu Msaidizi wa Shule ya Msingi John Bosco, Emmanuel Laurent Bilula, ameishukuru Idara ya Uhamiaji Mkoa wa Mara kwa kutoa elimu hiyo, akisema imewajengea wanafunzi uelewa na kuwawezesha kuwa mabalozi wazuri katika kulinda Taifa na kushirikiana na mamlaka pale wanapohitaji kutoa taarifa.






