MOROGORO: Serikali imewataka wanahabari kutumia kalamu zao na weledi wao kuongeza uelewa wa umma kuhusu Sera ya Taifa ya Usimamizi wa Mnyororo wa Ugavi, 2025, kwa kuzingatia takwimu sahihi, kueleza fursa zinazotokana na sera hiyo na namna inavyolenga kuimarisha matumizi bora ya rasilimali za umma.
Wito huo umetolewa na Naibu Waziri wa Fedha, Mhandisi Mshamu Ali Munde (Mb), wakati akifungua mafunzo ya siku mbili kwa Wahariri wa Vyombo vya Habari na Wamiliki wa Mitandao ya Kijamii ya Habari, yaliyofanyika katika ukumbi wa Hoteli ya Timeless, mjini Morogoro.
Mhe. Munde amesema vyombo vya habari vina nafasi muhimu katika kujenga uelewa wa wananchi kuhusu sera hiyo na namna inavyohusiana na matumizi ya rasilimali za umma.
Amesema usimamizi wa mnyororo wa ugavi unahusisha hatua mbalimbali, ikiwemo utambuzi na upangaji wa mahitaji, ununuzi, ugomboaji, upokeaji, utunzaji na uhifadhi, matumizi, usambazaji pamoja na uondoshaji wa bidhaa, vifaa na mali.
“Usimamizi wa mnyororo wa ugavi una athari ya moja kwa moja katika namna rasilimali za umma zinavyotumika na namna huduma zinavyowafikia wananchi. Hivyo, Sera hii ni nyenzo muhimu katika kuimarisha ufanisi, uwajibikaji, uwazi na matumizi yenye tija ya fedha za umma katika shughuli za mnyororo wa ugavi katika Sekta ya Umma,” alisema Mhe. Munde.
Aidha, alisema utekelezaji wa Sera ya Taifa ya Usimamizi wa Mnyororo wa Ugavi, 2025, unatoa fursa ya kuimarisha ushiriki wa wazalishaji, kampuni na watoa huduma wa ndani katika shughuli za mnyororo wa ugavi.
Kwa mujibu wa Mhe. Munde, hatua hizo pia zinalenga kuongeza matumizi ya bidhaa na huduma zinazozalishwa nchini, kuendeleza wataalamu wa ndani na kutumia teknolojia katika shughuli mbalimbali za mnyororo wa ugavi.
“Wahariri na waandishi wa habari ni kiungo muhimu kati ya Serikali, wadau na wananchi katika kufikisha taarifa hizi za kisera na kitaalamu kwa lugha rahisi na inayoeleweka. Ndiyo maana mpo hapa leo kupata uelewa zaidi kuhusu Sera hii,” alisema Mhe. Munde.
Aliongeza kuwa uelewa mpana wa wananchi kuhusu sera hiyo ni muhimu katika kuhakikisha jamii inafahamu namna mnyororo wa ugavi unavyohusiana na matumizi ya rasilimali za umma, utoaji wa huduma na maendeleo ya uchumi.
Mafunzo hayo ya siku mbili yanalenga kuwajengea uwezo Wahariri wa Vyombo vya Habari na Wamiliki wa Mitandao ya Kijamii ya Habari kuhusu Sera ya Taifa ya Usimamizi wa Mnyororo wa Ugavi, 2025, ili waweze kuifikisha kwa umma kwa usahihi, weledi na lugha inayoeleweka.






